ኢሲሲ- ራይዚንግ ሆንግፋ ኃ.የተ.የግ.ማህበር

ቀን: Nov 28, 2024

ኢሲሲ-ራይዚንግ ሆንግፋ ኃ.የተ.የግ.ማህበር የኢትዮጵያ ኮንስትራክሽን ሥራዎች ኮርፖሬሽን (ኢ.ኮ.ሥ.ኮ) ከራይዚንግ ሆንግፋ ጋር በመሆን በሽርክና ካቋቋማቸው የምርት ማምረቻ ማዕከላት አንዱ ነው፡፡ የዚህን ማዕከል 70 በመቶ ድርሻ ኢ.ኮ.ሥ.ኮ ሲወስድ ቀሪውን 30 በመቶ ደግሞ የቻይና እና የህንድ ባለሀብቶች ይወስዳሉ፡፡ ማዕከሉ በሥሩ ሁለት የሥራ ክፍሎች ያሉት ሲሆን አንደኛው አገልግሎቱ ያለቀ ጎማን በመፍጨት ለእግረኛ እና ለመሮጫ ትራክ የሚያገለግሉ ምርቶችን ያመርታል፡፡ ሁለተኛው ደግሞ የተሻለ የጥራት ደረጃ ያላቸውን ሆሎ ኮር የህንፃ ወለል እና ግድግዳዎችን የሚያመርት ክፍል ነው፡፡

ሆሎ ኮር (ባለ ቀዳዳ) የህንፃ ወለል እና ግድግዳዎች ከተገጣጣሚ ህንጻ አካላት የሚመደቡ ሲሆን የህንፃው መሠረትና ስላብ የሚጠበቅባቸውን ጭነት እና ሌሎች ሁኔታዎችን የመቋቋም አቅማቸውን ሳያጡ የህንፃውን ጥቅል ክብደት የሚቀንሱ ኮንክሪትን በመጠቀም የሚመረቱ የህንፃ ወይም ሌሎች የግንባታ ግብዓቶች ናቸው፡፡ በተገጣጣሚ ምርቶቹ ላይ ያሉት ባዶ ቦታዎች ወይም ክፍተቶች የህንፃውን መዋቅራዊ ጥንካሬ የማይቀነሱ ከመሆናቸው ሌላ ቀላል ክብደት ያላቸው በመሆናቸው ወደ ግንባታ ስፍራ እና በመገጣጠም ወቅት ለማንቀሳቀስ ምቹ ናቸው፤ እስከ 35 በመቶ የኮንክሪት ወጪን ለመቆጠብ ያስችላሉ፡፡

በእነዚህ ግብዓቶች የሚገነባ ህንፃ ጥሩ የድምፅ ስርገት የመቋቋም አቅም አለው፡፡ እሳትን ከመቋቋም እንፃርም ውጤታማ ግብዓቶች መሆናቸው ተረጋግጧል፡፡ የቤቱን የሙቀትና ቀዝቃዜ መጠን የማመጣጠን ችሎታ አላቸው፡፡ ህንፃውን በቀላሉ በማፍረስ ምርቶቹን ለሌላ አገልግሎት ማዋል ይቻላል፡፡ የመሬት መንቀጥቀጥን የመቋቋም  ችሎታቸውም ከፍተኛ ነው፡፡

ሆሎ ኮር የጥራት ደረጃውን የጠበቀ መደበኛ አርማታን እና በአንድ ላይ የተገመዱ ቴንሽን ገመዶችን በመጠቀም እና ቅድመ ቴንሽን የተደረጉ የሚመጣባቸውን ክብደት መቋቋም የሚችሉ ተገጣጣሚ ምርቶችን ያለምንም ሞልድ በማምረቻ ማሽኑ ቫይብሬሽን ብቻ የሚያመረት የማምረቻ ማሽን ነው፡፡

የማምረቻ ክፍሉ በመጀመሪያው የማስተዋወቂያ ጊዜ በመደበኛ የማምረት ሂደት በሳምንት  576ሜ² ግድግዳ እና 1,200 የወለል ስፋት ስላብ ማምረት የሚችል ሲሆን የገብያ ፍላጎቱን መሰረት በማድረግ እስከ አራት እጥፍ ማምረት የሚያስችል እቅም አለው፡፡ ኢ.ኮ.ሥ.ኮ የ70 በመቶ ባለድርሻ እንደመሆኑ ግብዓቱን በሚሰራቸው ፕሮጀክቶቹ በመጠቀም አጠቃላይ ለህንፃው የሚወጣውን ወጪ በመቀነስ እና ጥቅል የግንባታ እሴቶች ላይ አውንታዊ እምርታ በማምጣት ዘርፈ ብዙ የኢኮኖሚ ጠቀሜታ ይኖረዋል፡፡